رد “بدر” على التليفون وبعدها طلب يستأذن لظرف طارئ, سلمنا على بعض باهتمام وانصرفنا, (برجاء الرجوع للحلقة الأولى"لقاء استثنائي" للمتابعة)
صوت رسالة…“على فكرة انت هتوحشنى أوى”, دا كان “بدر” بعد ماسبته بدقيقة واحده… ابتسبت وبعت قولتله…" وانت شخص جميل أوى"…
صحيت تانى يوم بدري كالعاده ونزلت للشغل…, صوت رساله…:“كل سنة وانت طيب وعقبال 100 سنة ويارب تحقق كل اللى بتتمناه”…ايه دا!!! دى من بدر؟!.. غريبة , عرف منين ان النهارده عيد ميلادي… اممممم اكيد خد باله من تاريخ ميلادى على البروفايل بتاعي… بعدها بدقيقة واحده موبايلى رن… برضو “بدر”… : اياد كل سنة وانت طيب انا عازمك النهارده على الغدا… اوعى تقول لأ, انا أجازة النهارده ورتبت نفسي خلاص… هنتقابل فى نفس المكان بعد شغلك…, اندهشت ورديت: متشكر أوى يابدر وانت طيب… خلاص اتفقنا,
اتقابلنا فى المعاد, وااااو … بدر لابس تى شيرت وردي, اشراقة “بدر” جذابه جدا مع ابتسامته العريضة, سلمنا على بعض بشكل مختلف, زى مانكون عارفين بعض من سنين مش من ساعات, وبعد كده قعدنا وقدملى الهدية الأسرع فى حياتى من شخص بيجاملنى بهديه بعد مرور ساعات على أول مرة شافنى, اخترنا مطعم من المطاعم المعروفة فى القاهره… اتغدينا ومابطلناش كلام طول الوقت فى حاجات كتير, فى اليوم دا تحديدا بدر قالى كلمة فضلت فاكرها وعمري مانسيتها, قالى: " أرجوك يا اياد ماتسبنيش, انا محتاجك, ايا كان نوع العلاقة اللى ممكن تربطنا ببعض… بس اوعدني ماتسبنيش"… وبدون ادنى تفكير وعدته قولتله أطمن مش هسيبك…
روحت يومها وجوايا احساس غريب… مبسوط ومحتار فى نفس الوقت… فاكر يومها كويس اتمشيت كتير وانا مروح وكنت مستمتع بالجو والهدوء وكان يوم 14 من الشهر العربي والقمر كان بدر رائع, بجد احساس مايتوصفش.
بدأت أتعود على رسايل بدر اللى بيبعتها بشكل متواصل وبرد عليها ديما باهتمام وسعاده, افتكر مره قولتله انا كده هتعود رد قالى: “اتعود براحتك انا مش ناوى اعودك على حاجه وامنعها”,
مرت أيام متتاليه… مع لقاءات شبه متتاليه… اهتمام بيزيد, مع نفس احساسي ,مبسوط ومحتار… محتار عشان حاسس ان مشاعري بتتحرك بسرعة اتجاه شخص قابلته من ايام معدوده…
كتير بيقولوا ان الحب والمشاعر مش مرتبطة بوقت ولا بظروف وابسط دليل ان فى حاجه اسمها حب من النظرة الاولى… يمكن طول عمري مختلف مع الكلام دا, ديما بقول ان اللى ينام ويقوم يلاقي نفسه حب وارتبط, هينام ويقوم يلاقي نفسه انفصل بنفس السرعه, الزمن عامل مهم فى حياتنا صعب ننكره… واللى يفكر ينكره,لازم يراجع نفسه ويشوف قبل كده ازاى الزمن كشفله مشاعر مستخبيه من اشخاص يعرفهم كويس سواء مشاعر سلبيه او ايجابية.
.,.,.,.,روحى وخدانى تاخدنى معاك, وعايزانى أدوب فى هواك. واقولك أمرك أأمرنى منايا رضاك, معاك انت الحياه تتعاش ومن غيرك دى ماتسـ… أيوه يا اياد وحشتنى,… انت كمان يا بدر وحلوة اوى الكول تون… بجد عجبتك؟!.. أه طبعا وبحب أصالة كمان… عموما الكول تون دى عشانك… صمت… صمت… أنا بحبك يا اياد بحبك… صمت… بدر انا احساسي ناحيتك قوى اوى واكيد مش أقل من احساسك… بس فكر اكتر, اعرفنى اكتر, اعرفنى اكتر يا بدر, انا مبسوط بكل كلمة بتقولها وحاسسها بس فكر اكتر عشان خاطري,… انا فكرت وبقولك بحبك,
نهينا المكالمة, ردى على بدر كان غريب على الرغم من انى بحبه اوى كمان, بس غصب عنى بتحكم فى نفسي, الحب شئ قوى والارتباط أقوى… وحب عمري يستاهل انى اهتم بكل شئ من البدايه واتأكد من كل شئ, مش أنانيه بالعكس دا عشانه وعشانى… حابب انه يعرفنى أكتر ويشوف عيوبي ويقبلنى لأنى زى أى انسان مش كامل…
مرت أيام قليلة, بقابل بدر وبنتكلم كتير دا غير الاتصال والرسايل المتواصله, وكل يوم تقريبا بيحكيلي انه حلم بيا ويحكى تفاصيل الحلم كمان… بعضها عادى وبعضها رومانسي وبعضها بيحسسنى بالخجل,
حاسس بسعادة ولسه فى شويه حيرة, وفى يوم كنت راجع مرهق جدا بعد يوم شغل طويل , كلمت بدر كالعاده قبل مانام, وفاكر يومها سمعت أغنيه جديده لأول مره " فى جوه قلبي حاجه مستخبية كل اما باجى أقولها فجأه مش بقدر, ادام عينيك بقف وبنسي ايه يتقال, ليه كل مره يجرا فيها كده ليا ودى هى كلمة واحده بس مش اكتر والكلمه دى عندى فيها راحة البال…"
نمت… اليوم دا حلمت بـ"بدر"… قمت مبسوووط أوى مسكت موبايلي وطلبت بدر قبل مافتح عينى.,.,., روحى وخدانى تاخدنى معاك وعايزانى أدوب فى هواك واقوكــ.,., أيوه يا اياد… بدر أنا بحبك…بحبك أوى…مش قادر استنى اكتر من كده.,.,.,.,
“… حبيتك يوم ماتلاقينا لما حكينا أول كلام… حبيتك واحلف على دا…تسمع زياده… الناس فى عينى حاجه وانت حاجه تانيه عندك مشاعرى حتى خدها واسألها .انا صعب أعيش حياتى وانت لحظة بعيد… كانت حياتى ناقصة بيك تكملها, فرحة لؤايا بيك بتبقي زى العيد…”
وللحديث بقيه ان كان فى العمر بقية,
11/3/2014
… وهستنى غبطاتكو اخر الحلقات بقي