من الصومعة أتحدث إليكم وبجانبى 5كيلو برتقال …كل برتقلة عليها نتفة صرة تفكرنى بصرة الفلوس اللى كنت راابطها على بطنى وماكانش فيها غير 5جنيه،وبينى وبينك لازم نفطر على بروتين حيوانى فعلى الجهة الشمال 5جرام لحمة من عند الباشا الجزار الذى يسكن تحت عمارتنا…ولا يخفى عليك أن بينى وبينه ماصنع الحداد…فأنا أعترف بأنى بخيل فى زياراتى له ولكن اليوم تشجعت ودخلت وأنا أبتسم إبتسامة نابليون حين هزمه محمد الجزار وخلاه يرجع على ملا وشه من غير مايفتح عكا ولا حتى قدر يفتح سفن آب؟؟الراجل بصللى وقالى:
مش بعاده إيه إللى طق فى نافوخك وخلاك تدخل المحل ده؟؟
قلت له وأنا أدور فى دماغى على رد مقنع،أو جواب مفحم…فلم أجد على لسانى سوى
“كل سنة وأنت طيب يامعلم بكرة راس السنة الجديدة…وبافكرك يامعلم إن يوم 7رمن يناير عيد عندنا”
لم أره يضحك مرة منذ أن عرفته سوى اليوم…وقد أتحفنى بمنظر أسنانه كما اللؤلؤ…والظاهر اللى بياكل لحمة حمرا اسنانه بتبيض…وقال بصوت كله رقه وحنان…تقولش خروف وعرف انه هيمدبح فيستعطف صاحبه أن يتركه لحال سبيله؟؟صدقنى ماكنت أتصور أن القسوة والمعلمة دى مبنيه على فشوش…إنما المصرى من جواه قلب طيب…ورقه وعذوبة…واسنان بيضاء تستميلك أن تتحدث الى صاحبها بدون شك فى نيته،أو تخوف من طويته،ولكن ماقاله كان ينفع يتقال أغنية وكان لازم المرحوم عبد الحليم يغنيها لأنها مليانة رومانسية…ونظرآ لأن الزهايمر بدأ يطرق الباب…فلم أستطيع أن أحفظ مما قاله لى سوى:
كل سنة وانتوا بخير وسلام وربنا يهد القوى إللى عاوز يوقع بينا وبينكوا…والله انتوا ناس كمل…أدب…وأمانة…وفى حالكوا…وكلام تانى مش قادر أفتكره…
طلعت من المقابلة دى بحركة جدعنة…البيه الجزار الذى أصبح من اليوم صديقى طالما قلبه أبيض بالشكل ده…ونفسيته صافية بالطريقة دى…أهدانى نتفة كبدة…وقالى خمسة جرام لحمة إيه يادكتور…إنت مقامك عجل أو على ألأقل مقامك خروف…
متشكر قوى يامعلم والله مش قادر أقولك إيه…يارب ديمالحب بينا ونكون فى خير وسلام…ولا يكون بينا من يتسحب على طراطيف صوابعه ويحرق كنايسنا…أو كل يوم جمعة يزعق بصوت عالى لو فى ميدان رمسيس فى جامع أولاد عنان يسمعه ألأخ إللى فى ميدان تريومف فى مصر الجديدة…وهوه بيقول
غير المغضوب عليهم…ولا الضالين آمين؟؟؟؟
ولا ألأخ الذى يصر أننا كنا قردة وخنازير حتى نلنا ترقية فأصبحنا بنى آدمين لكن لاتسلموا عليهم…ولا تقولوا لهم كل سنة وانتوا طيبين؟؟حتى لا تدخلوا النار بسببهم؟؟
يارب فى هذه الليلة وما سيأتى بعدها من ليلى مباركة بذكرى مولد وهبوط الرب يسوع على تلك ألأرض ليتحمل وزر وخطايا البشر ويحطها عنهم…إغفر لنا خطايانا واجعلنا فى أمان وسلام
مسلمين ومسيحين
.